Follow by Email

Monday, 10 December 2012

Dip inna di healin' stream

Mi SEH!!!

Mi haffi get dis offa mi ches' but it neva safe fi approach di page while mi did still bex.  A pure indecent tings didda crass mi mind!
Afta mi leff mi yaad come a country in seek of wuk, mi come fi hear seh, nuttin naw go gwaan!!!!!
Eeh?
Mi waah bawl an cuss an lif' up mi frack simultaneously.  Mi cyaah deal wid suh much gyawbage.  Come een like mi ha' one sign heng pon mi farrid mark"City Dump".  Mi tell one a mi fren dem seh me is a qualified, certified laughing stock.
Box yuh neighbour if yuh know wah mi a talk bout...nuh tell nobaddy seh mi tell unoo fi tear dem wid lick enuh!!! Mi nuh able...
Boy mi get a save when mi fren come in pon di scene.  She reminded mi how Naaman did haffi dip seven times inna di murky water.  Sometimes when wi a buck di crasses dem back a dem one anedda a dip wi a  dip inna wi likkle dirty Riva Jordan.  Six times naw go do it- a seven times.  So crasses can walk in sevens too!!!  An ask if mi naw dip inna fi mi dutty Ganges riva-(apologies to my small readership in India, and Hindus from sweet T&T....mi nuh have none from Bangladesh so mi gud)

Or maybe wi a lick a Job season, when wi haffi showcase seh a nuh fish an' bread wi a serve God fah!
God nuh wicked!!!! Mi SURE a dat!  Him nuh love see people suffa-mi believe seh dat bleed Him heart big time.  But wi haffi get tested.
Bwoy mi fail dah tes' yah star!
Wi haffi hol' on during the rough times.

Hennyhoo....
Mi gone!

I am your Jodi, your Jodi, yours for keeps...

1 comment:

  1. You hear that...? MY JODI! Girl, you haffi tek kin teet' kibba heart bun yaw baby girl! So it go...

    ReplyDelete